كابوس - حكايات الشهر

حكايتي يا إخواني حكاية غريبه ماكنت أظن إنها حاتوصل لها المواصيل ... قولوا بإسم الله وإقرؤا حكايتي. في يوم من الأيام خرجت من البيت لشراء بعض الحاجيات طلبات المره قلت ياولد فين أروح أول شيء فين فين .. قلت في نفسي أروح للحلقه أشتري خضار وطلبات البيت طبعا أستلمت الراتب والجيب عمران وأول مادخلت الحلقه شفت واحد قاعد يبيع حبحب قلت في نفسي ياولد خذلك واحده فرّح بها أم العيال .. أشتريت واحده كبيره وأخذتها وأنا فرحان ورحت أشتريت باقي المقاضي من الحلقه ولمن رجعت على البيت أعطيت المقاضي لأم العيال والحبحبه "لاتنسوها" وجاء الغداء وأتغدينا وجبنا الحبحبه ولمن قسمتها بالسكين مادريت إلا وأنسحبت يدي داخل الحبحبه ودخلت جوتها صرت أصيح على أم العيال وأناديها الحقيني الحقوني يا أولاد .. ما أحد يسمعني ، لمن دخلت جوتها شفت قدامي غابه كبيره فيها شجر كثير وأنهار وبيوت كثيره وشفت أقزام ساكنين في هذه البيوت قلت في نفسي أروح أكلمهم عساهم يساعدوني مادريت إلا وجوا منهم خمسه أشخاص مسكوني وكفتوني وراحوا حطوني جوت قدر كبير وعبوا القدر مويه وولعوا النار من تحت القدر وأنا أصيح وأصرخ بأعلى صوتي .. النجدة النجدة ولا أحد يسمعني. حمية المويه وأنسلقت رجولي وماقصروا الأقزام حطوا في القدر بهارات وماء كادي وزعفران شي يفتح النفس طبعا هذا كله وأنا قاعد أنسلق ، وقطوا علي شوية بصل وثوم وكزبره خضراء .. يوم م م م م م وأنا قاعد أنسلق. بعد ماأنسلقت وأستوى لحمي كبوا علي الرز وقعدوا يقلبوني يقلبوني داخل القدر ووضعوا الغطاء على القدر ورخوا النار من تحت القدر. بعد ما أستوى الأكل غرفوني على التباس وقدموني للضيوف وجلسوا ياكلوني وجلست أكل معهم إترنّه ياولد لحمي لذيذ أتمنيت أم العيال تذوق على الأقل كبسة لحم بدل من الملوخية اللي هرتني بها كل يوم ، وبعد ما تغدينا والحمد لله جابوا لنا الفاكهه تخيلوا إيش .... جابوا لنا حبحب !! لــــــاــــ صرخت بأعلى صوتي .قولولي ليه؟ لأنني شفت أم العيال جوتها صرت أناديها وهي تناديني ومني محاوله ومنها محاوله حتى قدرنا نمسك أيادي بعض وهي تشد وأنا أشد وهي تشد وأنا أشد وتخيلوا يا أخواني إيه اللي حصل ....؟ صحيت من النوم ووجدت نفسي أشد المره من رقبتها وهي نايمه على السرير وبتصرخ بأعلى صوت وإذ بالفجر يأذن وهي السبب في حدوث هذا الحلم .. خلتني أشوف في الليل قبل ماأنا فيلم "كابوس في شارع إيلم". هل تصدقوني وإلاّ !!!!!!!! ... إنتهت الحكايه